நங்கூரமாய் நின்ற டாப் ஆர்டர் பேட்ஸ்மேன்கள் – 3ம் நாள் முடிவில் இந்தியா 215/2

இங்கிலாந்துக்கு எதிரான 3வது டெஸ்டில் இரண்டாவது இன்னிங்சில் இந்திய பேட்ஸ்மேன் புஜாரா சிறப்பாக ஆடி 91 ரன்கள் எடுத்து ஆட்டமிழக்காமல் உள்ளார்.

இந்தியா- இங்கிலாந்து அணிகளுக்கு இடையிலான 3-வது டெஸ்ட் லீட்ஸ் ஹெட்டிங்லே மைதானத்தில் நடைபெற்று வருகிறது. டாஸ் வென்று முதலில் ஆடிய இந்திய அணி, முதல் இன்னிங்சில் 40.4 ஓவர்களில் 78 ரன்களில் ஆல் அவுட் ஆனது.

இங்கிலாந்து சார்பில் ஜேம்ஸ் ஆண்டர்சன், கிரேக் ஓவர்டான் 3 விக்கெட்டும் ராபின்சன், சாம் கர்ரன் தலா 2 விக்கெட்டும் வீழ்த்தினர். ஜோ ரூட் சதமடிக்க 2ம் நாள் ஆட்ட நேர முடிவில் 8 விக்கெட் இழப்புக்கு 423 ரன்கள் எடுத்திருந்தது.

இந்நிலையில், இன்று மூன்றாம் நாள் ஆட்டம் நடைபெற்றது. இங்கிலாந்து 432 ரன்களில் ஆல் அவுட் ஆனது. இந்தியாவை விட 354 ரன்கள் முன்னிலை பெற்றுள்ளது.

இந்தியா சார்பில் முகமது ஷமி 4 விக்கெட் வீழ்த்தினார். பும்ரா, சிராஜ், ஜடேஜா ஆகியோர் தலா 2 விக்கெட் எடுத்தனர்.

நிதான ஆட்டத்தை வெளிப்படுத்திய விராட் கோலி

இதையடுத்து, இந்தியா 2வது இன்னிங்சை தொடர்ந்தது. அணியின் எண்ணிக்கை 34 ஆக இருக்கும்போது கே.எல்.ராகுல் 8 ரன்னில் அவுட்டானார். அடுத்து இறங்கிய புஜாரா ரோகித்துடன் ஜோடி சேர்ந்து நிதான ஆட்டத்தை வெளிப்படுத்தினார்.

ரோகித்-புஜாரா ஜோடி 82 ரன்கள் சேர்த்தது. அரை சதம் கடந்த ரோகித் 59 ரன்னில் அவுட்டானார். தொடர்ந்து இறங்கிய கேப்டன் விராட் கோலி மேற்கொண்டு விக்கெட் விழாமல் பார்த்துக் கொண்டார்.

மூன்றாம் நாள் ஆட்ட நேர இறுதியில் இந்தியா 2 விக்கெட்டுக்கு 215 ரன்கள் எடுத்துள்ளது. புஜாரா 91 ரன்னுடனும், விராட் கோலி 45 ரன்னுடனும் களத்தில் உள்ளனர். இந்தியா இன்னும் 139 ரன்கள் பின்தங்கிய நிலையில் உள்ளது.

இங்கிலாந்து சார்பில் ஆலி ராபின்சன், ஓவர்டோன் தலா ஒரு விக்கெட் வீழ்த்தினர்.